Jan

Jan Ji Weşanên Lîsê Derket!

Salên 90’î. Piştî derbeya eskerî a Îlona sala 80’yî. Li Bakurê Kurdistanê. Ligel şerê taybet, meşandina şerê qirêj, li pêş çavan desteserkirin û şopwindakirina Kurdan. Rêxistinên tarî û kujerên ji kûrahîya dojehê hatî. Salên bi seqaya tirs û xofa mezin rapêçandî. 

Li Amedê, li derdora dersxaneyekê berfirehbûna bûyerine nasyar. Jîyana rojane a Selîm, Wedat, Gulîstan, Perîxan û hinên din çawa nola hemû hemwelatîyên Amedê bi awayekî xwezayî dawîya dawî dibe armanca rêxistinên tarî. Destêwerdana sîxûrên ku yek ji endamên van hêzên tarî ne çawa hêdî hêdî qesta jîyana wan dikin.

Ligel  ew qas wêranî, derbiderî, êş û janên giran dilsozîya karakteran bi helbest, roman û çîrokê re. 

Îlhamî Sîdar, bi Janê, di vê romana kurt, lê bi derb de, bi zimanê helbestî, hêmayî, bi pênasekirina nivîskar, helbestvan û fîlozofên mezin re awayekî ji awayan xwendevan bi xwe re dibe nava kakilê Janê. Janeke zirav, giran û bi qandî barê dîrokeke ku hatiye qedexekirin biêş.

Îlhamî Sîdar • Li Misircê ji dayik bûye. Dibistana seretayî û navendî li Misircê xwendiye. Perwerdeyîya xwe ya bilind li Zanîngeha Enqereyê di beşa wêjeyê de biriye serî. Ji ber polîtîkayên asîmîlasyonê bi Tirkî dest bi nivîsandinê kiriye, piştî salên 2000’î Kurdî hîn bûye û di sala 2011’an de yekem romana wî ya bi Kurmancî Tehma Xwelîyê çap bûye. Di 2013’an de romana xwe ya duyem (Melekler de Ölür ) wergerandiye Kurmancî, di 2015’an de romana wî ya bi Kurmancî ya duyem Xewneke Payîzê û di sala 2021’ê de romana wî ya bi navê Memê Dîn çap bûye. Di 2018’an de Dîwana Melayê Cizîrî latînîze kiriye û bi forma helbestê wergerandiye Tirkî. Berhemên wî yên bi Tirkî hatine çapkirin ev in; Sözlerin Yalazında (helbest, 1999), Bir Cudi Söylencesi (roman, 2003), Alışkın Hüzünler (helbest, 2004), Melekler de Ölür (roman, 2005), Dağlı (roman, 2007), Başka Gökyüzü (roman, 2009), Sadakat  (roman, 2014), Şiirli Dağ (roman, 2016), Masum Saat (helbest, 2017), Gitmediğim Bir Yerde (roman, 2019), Bizi Tüketen Ateş (roman, 2022).